(Wednesday , 10 December,2025)
mountainejournal.com
काठमाडौँ । मधेस प्रदेशका ८ जिल्लाहरुमा सुख्खाका कारण धान रोपाइँ हुन नसके पछि कृषि तथा पशुपन्छी विकास मन्त्रालयले मधेस प्रदेशका ८ वटै जिल्लामा अध्ययन टोली पठाउने भएको छ । मन्त्रालयले हालको अवस्था र समस्या समाधानका लागि गर्न सकिने तत्कालीन र दीर्घकालीन उपाय र विकल्प अध्ययन गर्न कृषि प्राविधिकको टोली पठाउने निर्णय भएको हो ।
आइतबार सो क्षेत्रमा अध्ययन टोली पुग्ने छ । शुक्रबार कृषि तथा पशुपन्छी विकासमन्त्री रामनाथ अधिकारीले मन्त्रालय र मातहतका कर्मचारीहरुसँग छलफल गरी तुरुन्तै सो क्षेत्रमा टोली पठाउन निर्देशन दिएका थिए । मन्त्री अधिकारीको निर्देशन अनुसार प्रत्येक जिल्लामा केन्द्रवाट २÷२ जनाको दरले टोली पठाउने निर्णय भएको हो ।
मन्त्री अधिकारीका अनुसार टोलीले मधेस प्रदेशमा रहेका मन्त्रालय अन्तर्गतका कार्यक्रम र आयोजनाका कर्मचारीहरुसँग पनि समन्वय गर्ने छ । मधेस प्रदेश सरकारले लामो समय सो क्षेत्रमा पानी नपर्दा खाने पानीको समेत अभाव भएको र धान रोप्ने अवस्था समेत नभएको भन्दै केही दिन अघि सुख्खा ग्रस्थ क्षेत्र घोषणा गरेको थियो । मन्त्री अधिकारीले अबको केही दिन भित्र वर्षा नभएको अवस्थामा तिनै तहको सरकारले विकल्प खोज्नु पर्छ , मन्त्रालय मातहतका सबै निकायलाई यसतर्फ लगाउनु पर्छ ।
हाल रहेका सिँचाइका संरचनाहरुलाई पुर्णरुपमा सञ्चालन गरी, सिँचाइका लागि अन्य विकल्पहरु के के हुन सक्छन सम्बन्धित निकायसँग छलफल गरी तत्कालीन र दीर्घकालीन निर्णय गरिने मन्त्री अधिकारीले जानकारी दिए । मधेशका ८ जिल्लामा हालसम्म करिब ४६ प्रतिशत रोपाई सम्पन्न भएको मधेस प्रदेश कृषि मन्त्रालयले जनाएको छ ।
प्रतिक्रिया